على طريق الـنجاح

بقلم: معاذ هيكل

للناس الى مستصعبة الموضوع ومستتقلة الطعم و موضوع الملح وكده .. انا مش هكرر الكلام واحكى عن قد ايه انا بحب الاكل .. بس الموضوع كان بالنسبالى مش جوع وشبع .. الموضوع كان متعة بالمعنى الحرفى للكلمة .. مافيش لقمة كانت بتخش بقى من غير ما اغرقها تومية او طحينة او مايونيز .. كل اكلة ليها اضافتها الى كنت بهتم بيها قبل الاكلة نفسها ..علشان اتأكد انى اوصل لاعلى درجات الطعم الفشيخ ..
- انا حد زايد عن وزنه 50 كيلو .. بس كده
زى اكتر من 10.000 واحد انبهر بالبوست بتاع مصطفى .. اكتر حاجة حستها وفرقت معايا هى انه فرحان جدا بالنظام .. ده حد 190 كيلو .. الاكل بالنسبه له مش هزار ..ازاى واحد زى ده يبقى فرحان بيه كده .. والبوست مكتوب بعد تقريبا 3 شهور من تجربته للنظام .. الله اكبر وبسم الله ماشاء الله .. 3 شهور بياكل الاكل ده ومتحمسله كده !! .. ده تلات شهور هى اتخن فتره شفت فيها حد عمل دايت اصلا ..و ده عكس كل الى جربوا اى نظام رجيم تانى كانوا بيعدوا الايام الى هيخلصوا منه .. واعرف ناس بتخطط ليوم الفرى من اول يوم فى الرجيم

- اكيد فيه سر ؟!

اتحمست جدا .. خصوصا انى كنت بفكر جديا فى الحل الجراحى .. بس قولت اجرب .. مدخلتش فى النظام على طول .. مطبقتوش تانى يوم .. خالص .. انا قولت افهم الاول .. ودى اكتر حاجة فعلا فرقت معايا واول حاجة لازم اى حد يعملها "من وجهة نظرى" علشان يقدر يكمل .. لو معملهاش اكيد هيضعف
لو انت مستتقل الموضوع .. ده معناه انك محتاج تغير افكارك ورؤيتك للاكل الى النظام ده منعه .. محتاج حد يوريك قد ايه جسمك بيعانى من الاكل ده .. محتاج حد يكرهك فيه .. انا فعلا دلوقتى شايف الحاجات دى سموم وقرف.. والله العظيم انا دلوقتى بشفق على كل الى بيكله وبتمنى انه ربنا ينجيه منه !

- اوباااا .. التغير ده حصل ازاى .. ؟!

1- اولا دخلت على قصص النجاح "Success Stories" الى على موقع "Forks over Knives"

فيه اكتر من 100 قصة نجاح .. قريت حبة حلوين .. الناس بتحكى بطريقة خلتنى اقتنع ان موضوع الخسسان ده اقل فايدة بتطلع من النظام ده اصلا .. ناس بتتكلم عن مشاكل جلدية وامراض مزمنة انتهت وشيخوخة بتتراجع وطاقة 10 سنين ورا رجعت تانى .. وندم على كل اكلة ضر بيها صحته وجسمه .. وانهم معملوش النظام ده من بدرى .. كل القصص بجميع انواع واعمار الى كتبها بتوصلك الفكرة دى وبحماس فشيخ ..
-الموضوع بجد بقى ..

2- الفيلم الى عمله الموقع نفسه .. الفيلم عبقرى فعلا .. كان ليه الجزء الاكبر من التغير .. هيفهمك كل حاجة وهيوريك الى بناكله ده تاثيره عامل ازاى على صحتنا وهيكسر لنا كل الاساسيات الى كنا فاكرنها صح .. بالعلم مش كفته ..بصراحة اثر فيا جدا جدا .. للاسف الفيلم صعب تلاقية اونلاين او تعمله دونلود واسهل طريقه انك تشتريه من الموقع نفسه .. وموجود رابط تحميله في الرابط ده, مع الترجمة: من هــــنا

3- " الكتاب " لو انت لقيت صعوبة فى الفيلم والترجمة وكده اقرا الكتاب .. الكتاب هو الفيلم وانا شايف ان فية ناس بدأت تترجمه .. اقروا الكتااااااااااااااااااااااب .. لو انت عايز تكمل ومتضعفش .. شوف الفيلم او اقرا الكتاب ..

4- قشطة بعد حوالى اسبوعين من القرايا والدعبسة ..انا "اقتنعت" و" وفهمت " والحماس كان لاخره .. وابتديت على بركة الله ..


- انا بقالى 10 ايام بالتمام والكمال .. من يوم 31/1/2016 .. 10 ايام من غير اكل مضر ومن غير ما ابقى عايز اكله و مستنى اليوم الى هكله فيه .. ولاول مرة .. اهلى هما الى نفسهم يكلوا زيى مش انا الى اكل زيهم ..
- انا خسيت 4 كيلو .. ومبقتش اسقط فى العربية وانا راجع من الشغل .. ومن غير جوع بتاتا
- من غير كلكعة منعت الى مفروض يتمنع ..واكلى بقى طبق مكرونة بالسلطة .. بطاطس الفرن بالسلطة .. جربت العدس باللمون تحفة .. فول بالطماطم .. رز بالخضار او رز بالزبيب والمكسرات "مش كتير " وباكل لحد ماشبع .. اللهم لك الحمد
- الموضوع مش بسيط .. زى كل حاجة كويسة تستحق التعب ومافيش اغلى من الصحة .. والتعب مش دائم ده لحد ما تتعود .. ولما تحس بالتغير هتحبه وهتتحول لداعية ليه كمان ..
- فيه حاجات بقى صغيرة بس بتفرق .. شرب المية 3 لترعلى الاقل فى اليوم و النوم 10 باليل والصحيان 6 الصبح .. الاتنين دول بس فرقوا معايا الضعف .. من غيرهم كيلو ونص اول 5 ايام .. وبيهم خسيت 3 كيلو الـ 5 ايام الى بعديهم .. وش كده !!
- البداية فى تغير افكارك .. وانك تفهم .. "الفيلم والكتاب وقصص النجاح" .. وتوكل على الله ..

مصطفى حلمي .. شكرا
‫#‏احنا_كتير‬