أكذوبة البروتين وأمراض العصر الحديث

بقلم: بيتر خليل

تحذير: المقال ده هدفه التوعية، و الكلام اللي هكتبه هنا مش كلامي، ده ما أثبتته الأبحاث الطبية، و هحاول على قد ما أقدر أكتب المراجع لكل حاجة بكتبها.

كتير مننا سمع قرار مؤسسة الصحة العالمية في أكتوبر ٢٠١٥ بتصنيفهم للحوم المصنعة (processed meat) زي اللانشون والهوت دوج والبرجر كمسببات أساسية للسرطان (بالأخص سرطان القولون)، نفس التقرير برده قالوا فيه أن اللحوم الحمراء (بقري، خرفان، معيز، خنزير، ...) قد تكون مسببة وأن العلاقة لسه مش مؤكده.

طيب ايه العلاقة؟ و هل لازم نبطل ناكل لحوم حمراء؟

الحقيقة أنا فضلت أبحث في الموضوع وقريت الأوراق العلمية اللي اتكتبت في الموضوع ده في أخر ٢٠ سنة (بواقع عملي في المستشفى اللي أنا فيها، في فريق موجود بقولهم أنا عايز الأبحاث اللي اتعملت عن أي موضوع طبي، و هم بيجيبولي كل الأبحاث اللي اتنشرت عن الموضوع ده في المدة الزمنية اللي بقولهم عليها)، والحقيقة اللي صدمتني ان كل المنتجات الحيوانية (أيوه كلهم)؛ سواء لبن، أجبان، بيض، لحوم، فراخ، وحتى الاسماك مثبت علمياّ انهم ذات علاقة وثيقة بكل أمراض العصر الحديث: السرطانات، أمراض القلب والجلطات أوالسكتة الدماغية، السكر، السمنة والوزن الزائد،....

أنت ممكن تكون مصدوم دلوقتي، و بتقول ايه التخريف ده! أمال هجيب البروتين منين و إزاي جسمي ممكن ينمو من غير مصدر حيواني! هقولك دلوقتي موضوع البروتين ده، بس الأول؛ خلينا نفهم مع بعض (للناس اللي بتحب تستفيض في العلم) ايه علاقة الأمراض دي بأكل اللحوم والبيض واللبن.

نبدأ بالسرطانات 

و ده اتنشر عنه أبحاث كتير جداّ، منهم على سبيل المثال في مجلة (Cell Metabolism) يوم ٤ مارس ٢٠١٤، اتنشر مقال اسمه

(Low protein intake is associated with a major reduction in IGF-1, cancer, and overall mortality in the 65 and younger but not older population)

اللي حصل أن بعض الباحثين عملوا دراسة على أكتر من ٦٣٠٠ شخص. وقسموهم على حسب استهلاك كل واحد للبروتين (وقسموهم تاني على حسب نوعية البروتين اللي بيأكلوه؛ حيواني أو نباتي) وتابعوهم على مدار ١٨ سنة.

لقوا أن الناس اللي كانت بتدخل بروتين "حيواني" كتير جوا جسمهم (أكتر من ٢٠٪ من أكلهم بروتين حيواني) بيجيلهم سرطان ٥ مرات أكتر من اللي كان استهلاكهم قليل (أقل من ١٠٪ من أكلهم من مصدر حيواني). العجيب بقى انهم لقوا أن الناس اللي كان مصدر البروتين عندهم نباتي "و بس" مهما كانت كميته محصلهمش أي مشكلة!

في نفس الدراسة دي، عملوا تجربة على الفئران؛ انهم قسموهم مجموعتين على حسب نظام تغذية؛ مجموعة بتاخد ١٨٪ من أكلها بروتين و المجموعة التانية ٧٪ بس من أكلها بروتين. بعدها ب أسبوع حقنوا الفئران كلها (المجموعتين) بخلايا سرطان الثدي. لقوا ان المجموعة اللي ١٨٪ من تغذيتهم كانت بروتين، كلهم جالهم السرطان بنسبة ١٠٠٪ (طبيعي يعني أنت حقنتهم سرطان)!

لكن اللي مش طبيعي أن المجموعة اللي كان ٧٪ بس من تغذيتهم بروتين، ٧٠٪ بس منهم جالهم السرطان. يعني ٣٠٪ منهم اتحقنوا سرطان و مجالهمش حاجة لمجرد أن تغذيتهم فيها بروتين أقل!!

طيب ليه؟ الفكرة أنهم لما حللوا الدم للناس دي اكتشفوا أن البروتين الحيواني (أي منتج حيواني) بيعلي في جسمك حاجة اسمها IGF-1/ Insulin-like growth factor-1 و ده عامل نمو، بيخلي الخلايا تكبر، و هو بيتفرز طبيعي في جسمك من الكبد، بس المنتجات الحيوانية بتزود الهرمون ده أوي في جسمك والخلايا ساعات بتنمو بزيادة وتتجنن و تقلب سرطان (السرطان ليس الا نمو مفرط وغير محكوم للخلايا).

السكر

بلاش السرطان، في نفس البحث ده لقوا أن اللي كان استهلاكهم عالي للبروتين الحيواني عندهم خطر الأصابة بمرض السكر ٧٣ مرة أكتر من اللي دخول البروتين الحيواني جسمهم قليل. أه انت قريت صح، ٧٣ مرة. و ده بيرجع برده لزيادة ال IGF-1 اللي زي ماهو واضح من أسمه، هو هرمون شبيه بالانسولين وزيادته بتخلي الخلايا بتعتك تستجيب بصورة ضعيفة للانسولين الطبيعي اللي بيطلع من البنكرياس بتاعك.

في الدراسة دي برده لقوا أن إجمالي الأمراض المسببة للوفاة زي السكر والجلطات والسمنة وأمراض القلب في الناس اللي استهلاكها للبروتين الحيواني عالي؛ أعلى بنسبة ٧٤٪ من الناس اللي كان استهلاكها للبروتين الحيواني قليل. (increase in overall mortality by 74%)

جدير بالذكر أن الباحثين برده لقوا أن الموضوع معكوس عند الناس اللي فوق ال ٦٥ سنة، وان اللي كان استهلاكهم للبروتين الحيواني أكتر في الفئة العمرية دي كان بيجيلهم سرطانات أقل "بس ده برده كان للي بيستهلكوا مأكولات حيوانية مش نباتية".

بحث تاني اتنشر في مجلة (European Journal of Clinical Nutrition) في مايو ٢٠٠٩ كان عن تأثير البروتينات اللي في اللبن على الأطفال قبل سن البلوغ؛
(معلومة ع السريع؛ البروتينات اللي في اللبن ٨٠٪ منها بروتين اسمه Casein، و ال٢٠٪ الباقيين بروتين اسمه Whey.)

نتيجة البحث ده انهم لقوا أن الCasein اللي في اللبن بيزود ال IGF-1 بنسب غير طبيعية، واللي بدوره بيزود نمو الخلايا بمعدل فوق الطبيعي وممكن تقلب بسرطان، وأن ال Whey بيعلي نسبة الأنسولين جدا في دمك (insulin spike) وده بينتج عنه على المدى الطويل ما يعرف بال (insulin resistance)؛ وهو أن الخلايا في جسمك احساسها بالانسولين بيقل من كتر ما أنت بتلسوعها بالكرباج (ال spikes) وده اللي هو ببساطة مرض السكر.

لقوا برده أن ال whey بيزود في نمو الخلايا بطريقة مفرطة (وعلشان كده هو أشهر مكمل غذائي في الجيم علشان تكبر عضلاتك بسرعة). زيادة النمو اللي بتتعمل بسبب ال whey كان سببها ارتفاع ال insulin بنسب عالية مش ال IGF-1 وبالتالي مش مثبت إذا كان ممكن يجيب سرطانات أو لأ، ولكن في الأغلب لأ مش بيعمل سرطان. بس تبقى مشكلته الأساسية في إن استهلاكه لفترات طويلة بتسبب مرض السكر.

موضوع أن ال whey بيعمل insulin spike ده كلام معروف مش بس عند الدكاترة، لا، حتى في مواقع ال bodybuilding هتلاقيهم بيقولوا أن ده أصلا من فوائده لأن الانسولين لما بيعلى ده بيوصل ال amino acids (الوحدات البنائية للعضلة) بصورة أسرع للعضلات فتكبر أسرع. و ده كلام حقيقي؛ بس خلي بالك أنه ع المدى الطويل جسمك مش هيستحمل اللسوعة وممكن يجيلك السكر، خاصة لو أنت عندك العامل الوراثي (والدك أو والدتك عندهم السكر).

لاحظ برده أن كوباية اللبن الواحدة فيها ١٢ جرام سكر (اللي هو معلقتين ونص سكر)، وده برده بيتصنف من ال simple sugars زيها زي سكر القصب اللي بتحطه ع الشاي العادي واللي بيعمل في جسمك insulin spike وبدورها ممكن تعمل مرض السكر. ولو بتجيب اللبن كامل الدسم، فأنت بتضيف عليها كمية محترمة من الدهون المشبعة والكوليستيرول (الكوليستيرول موجود حتى في اللبن الخالي الدسم) اللي بتقفل الشرايين.

معلومة بسيطة بعيدة عن المنتجات الحيوانية؛ أي refined carbohydrate بيعملك برده insulin spikes واللي بدورها برده هتبدأ دايرة المرض الملعون ده، ال refined carbohydrates دي اللي هي النشويات بعد ما لعبنا فيها علشان نحسن من طعمها؛ مثلا: الدقيق لما خليناه أبيض (الطبيعي انه أسمر)، الأرز الأبيض (الطبيعي برده أنه أسمر)، السكر (المستخرج من القصب أو أي نبات تاني)، العصير الفريش (و ده لأن الفاكهة السكر فيها بيبقى مرتبط بحاجة اسمها dietary fiber اللي بتخلي السكر يحصله release ببطء للدم، لما بتعصرها، مش بيتبقالك غير السكر، اللي بدوره برده بيعملك insulin spikes، يعني الفاكهة تأكلها متعصرهاش) .

في أغسطس ٢٠١٤ في مجلة (World Journal of Men’s Health) اتنشر بحث عنوانه
(A milk protein, Casein, as a proliferation promoting factor in prostate cancer cells)
البحث ده يا سيدي درس تأثير بروتين ال Casein موجود في اللبن على الخلايا السرطانية للبروستاتا (PC3 and LNCaP cells) لقوا ان البروتين اللي في اللبن ليه تأثير عنيف في نمو الخلايا السرطانية دي بالذات، وانهم لما حرموا الخلايا السرطانية دي من ال Casein نموها توقف تماما!
 علشان كده في أمريكا (استهلاكهم للألبان و منتجاتها كبير جدا) في حالة سرطان بروستاتا جديدة بتتشخص كل ٣ دقائق وحالة وفاة من سرطان البروستاتا كل ١٩ دقيقة ( في أمريكا سرطان البروستاتا هو تاني أكتر سرطان منتشر بعد سرطانات الجلد).

أما عن موضوع أمراض القلب وعلاقتها بالبروتين الحيواني

 ف دي حاجة مفيش خلاف عليها منذ قديم الأزل وبتدرس كحقائق طبية مؤكدة خلاص! أمراض القلب و الجلطات كلها بتيجي بسبب ان شرايينك بتتسد، والانسداد ده بيكون بسبب تجمع الكوليستيرول والدهون المشبعة اللي هي حاجة مستحيل تعلى في جسمك غير من الأكل الحيواني (الدهون المشبعة موجودة في بعض النباتات و لكن بنسب قليلة جدا ولا تقارن مع الحيوانات على الأطلاق.

أما الكوليستيرول "الشيطان الأكبر" و هو أساس المصايب؛ مش موجود في النباتات على الاطلاق، موجود في المصادر الحيوانية بس).

و مع ذلك في دراسة اتنشرت في مجلة “Current Atherosclerosis Reports” في ديسمبر ٢٠١١؛ اسم الدراسة protein and coronary heart disease: the role of different protein sources
في الدراسة دي لقوا أن الناس اللي بتستهلك بروتين حيواني أقل كان نسبة اصابتهم بأمراض القلب وانسداد الشرايين أقل ب ١٣ – ٣٠٪ من اللي بيستهلكوا بروتين حيواني كتير، مجرد أن الناس قللت في المنتجات الحيوانية نتج عنه فرق واضح في نسبة حدوث المرض، فما بالك باللي بيمتنع أصلا عن الحاجات دي. كمان لقوا أن الناس اللي بتستهلك بروتين حيواني وزنهم في نهاية الدراسة زاد بنسبة ١ كجم لكل ١٢٥ جم لحوم بيأكلوها في اليوم.

في نفس الدراسة تابعوا مجموعة من الناس اللي بيستهلكوا منتجات حيوانية عالية ولقوا أن نسب الوفاة فيهم أعلى ب ٢٣٪ عن المعدل الطبيعي. وتابعوا ناس تانية بيعتمدوا في أكلهم على الخضروات و لبروتين النباتي أكتر؛ لقوا أن نسب الوفاة بينهم قلت ب ٢٠٪ عن المعدل الطبيعي.

دي كانت أبحاث على سبيل المثال لا الحصر، الخلاصة هي أن المنتجات الحيوانية من أهم مسببات السرطان و السكر و أمراض القلب، طبعاّ فيه عوامل تانية بتتحكم في نمو الخلايا السرطانية أو أن يجيلك أي مرض من الأمراض دي زي العامل الوراثي، العوامل البيئية، التعرض لاشعاعات و حاجات تانية كتير. بس عامل التغذية هو تقريبا العامل الرئيسي و هو الحاجة الوحيدة اللي ليك كامل التحكم فيها.

في بعض الأبحاث التانية اللي اتعملت عن علاقة البروتين الحيواني بالزهايمر وفقدان الذاكرة وأمراض المناعة وهشاشة العظام، أنا لسه بقرأ في الأبحاث دي و لما أطلع بالخلاصة ان شاء الله هكتبه هنا.

دلوقتي نيجي للأسئلة الشائعة عن الموضوع ده و هحاول أجاوب على اللي أقدر عليه:

١- ايه الحل؟

الحل بدأ بمجموعة من الدكاترة بقيادة ثلاثة من عظماء الطب اسمائهم Dr. Caldwell Esselstyn و ده دكتور كبير في كليفلاند كلينيك (أكبر مستشفى لأمراض القلب في أمريكا) و اتدرج في مناصب كتير في المستشفى دي منها أنه كان رئيس وحدة Cardiovascular disease prevention and reversal program و اللي نجح عن طريق تعديلات في الأكل أنه يرجع الشريان التاجي المقفول انه يتفتح تاني من غير عمليات أو أدوية! مجرد الأكل! It is that simple

والتاني هو دكتور وباحث كبير في مجال بحوث التغذية بجامعة كورنيل (وهي من أكبر المعاهد الطبية في أمريكا) واسمه Colin Campbell.

الثالث هو Dr. Dean Ornish وهو حالياّ بروفيسور في جامعة كاليفورنيا بسان فرانسيسكو (UCSF) وهي من أكبر الجامعات في أمريكا برده.

المجموعة دي كان عندهم فكرة بدأت في التمانينات، و بدأت تأخد صيت كبير و ناس تسمع عن التجربة دي و تطبقها في أوائل الألفينات؛ وهي أن معظم أمراض العصر بسبب اننا كبشر بقينا بنلعب في أكلنا، واننا بقينا بنستهلك بروتين حيواني كتير. بس كده.

فضلوا يعملوا في أبحاث هم الثلاثة وتوصلوا إلى ان الحل الأنسب للأمراض دي كلها يتلخص في كلمتين: مناكلش أي منتج حيواني، و مناكلش حاجة الطبيعة مش بتديهالك. نظام تغذية سموه Whole Food Plant-Based Diet أو ال WFPBD.

طيب مناكلش منتجات حيوانية دي مفهومة. لكن ايه مناكلش حاجة الطبيعة مش بتديهالنا دي؟ يعني الأكل يكون طالع من الأرض بصورة عضوية من غير لا كيماويات ولا مبيدات حشرية ولا مواد حافظة و لا أي حاجة.

من الأخر، مفيش manipulated or processed food. يعني مش بيقولك تمشي على نظام نباتي علشان حقوق الحيوان والكلام ده، لأ خالص، هو نظام مختلف عن النظام النباتي تماما، هو عايزك تأكل اللي الطبيعة بتديهولك وأنت اللي تطبخه في البيت، من غير ما يعدي على أي عملية تصنيع أو مواد حافظة أو كيماويات مضافة.

طب النظام ده نجح؟

 أه نجح جدا كمان، أشهر واحد طبق النظام ده هو الرئيس الأمريكي السابق بيل كلينتون. بيل كلينتون جاله (زي ما بيحصل مع معظم الناس بسبب الأكل الحيواني) انسداد في الشريان التاجي، ركب دعامة و اتسدت، فالراجل كان خايف على نفسه شوية، قعد يدور ع النت اكتشف نظام د. ايسلستين ده، و لقى أن الاحصائيات بتقول أن ٨٢٪ من اللي بيتبعوا النظام ده بيرجع الشريان التاجي طبيعي! قال طيب ما نجرب؛ و بالفعل، الراجل جرب النظام. تخيل كانت ايه النتيجة، الشريان التاجي رجع اتفتح تاني و بقى طبيعي! دي حاجة الطب بكل علمائه وعباقرته والتطور التكنولوجي الرهيب في المجال الطبي عجز انه يعملها! لو عايز تسمع تجربة بيل كلينتون، من هنا

و لاحظ أن د. إيسلستين اللي هيتكلم في الفيديو ده كان عنده وقتها ٧٧ سنة! ده بس علشان تفهم اللي بيتبع النظام ده بيفضل بصحة جيدة ازاي لعمر طويل.

واحد تاني من المشاهير اللي متبعين النظام ده، هو باسم يوسف، و هو متبع النظام ده من سنة ٢٠١٣ تقريبا و كان ليه مقالات كتير عن الموضوع ده برده.

مشاهير تانيين كتار اتبعوا النظام ده لتحسين صحتهم أو أعلنوا دعمهم للموضوع زي
Oprah Winfrey, Ariana Grande, Dr. Oz, Mike Tyson, Usher, Russell Brand, ...
و غيرهم كتير...

عايز تعرف أكتر عن الموضوع ده؟

 شوف الفيلم الوثائقي اللي اتعمل عليه، اسمه forks over knives مدته ساعة و نص تقريبا، بس أكيد هيغيرلك مفاهيم كتير في حياتك، تقدر تشوفه  من هنـــا (مترجم للعربية ضمن أفلام أخرى)

للتوضيح بس تاني، النظام ده انك تاكل الحاجات اللي بتخرج من الأرض زي ما الطبيعة بتديهالك، ده معناه مينفعش تستخدم دقيق أو أرز أبيض، لان معظمهم بيبقى مرشوش عليهم كيماويات للتبييض، ده غير أنها بتعمل insulin spikes، استخدم البني زي ما الطبيعة اديتهولك. متستخدمش أي زيوت حتى زيت الزيتون لأن ده مش حاجة الأرض بتديهالك، ده حاجة اتلعب فيها في مصنع! (ده غير أنه يحتوي على دهون مشبعة "٢ ج في كل ملعقة"، و هي دهون بتتراكم في شرايينك مع الوقت و ممكن تسدها)

حاجة تانية، فول الصويا (الحبيبات الأصلية اللي جاية من الأرض من غير أي لعب) حاول تتجنبها على قد متقدر لأنها زي البروتين الحيواني، هي النبات الوحيد اللي بيزود ال IGF-1 حتى و لو بنسب أقل من البروتين الحيواني، بس برده وجوده بيمثل خطر لاصابتك بالسرطان. (دي نصايح د. إيسلستين مش كلامي).

حاجة أخيرة عن النظام ده (بحسب د. إيسلستين) النباتات اللي مليانة دهون زي المكسرات والأفوكادو، استخدمهم بس متكترش أوي فيهم، لأنها ما زالت دهون وزيادتها عن اللازم ممكن تسبب جلطات وانسداد في الشرايين، المفروض تكون حوالي ١٠٪ من اجمالي السعرات الحرارية اللي بتدخل جسمك.

د. إيسلستين شايف أنك لو أكلت من الأكل الطبيعي من غير ما تفكر وتحسب بس بشرط أنك تنوع في أكلك؛ هيبقى أكلك مكون من ٨٠٪ تقريبا كاربوهيدرات و ١٠٪ دهون و ١٠٪ بروتين. ودي أفضل نسبه في رأيه لتجنب أمراض السرطان وانسداد الشرايين والجلطات.

٢- يعني لو أكلت أي أكل حيواني هيجيلي الامراض دي؟

لأ طبعاً، الاستهلاك الزائد للمنتجات الحيوانية البحوث أثبتت علاقتها بالأمراض دي، مش معنى كده أنك طالما استهلكت منتج حيواني يبقى لازم تمرض لأن المرض بيعتمد على عوامل كتير، بس أهمهم هو التغذية،  دي تقريباً الحاجة الوحيدة اللي تقدر تتحكم فيها، بمعنى أن استهلاكك للمنتجات الحيوانية مش لازم ينتهي بمرض من الأمراض اللي فوق دي كلها، بس لو امتنعت عن المنتجات الحيوانية أو قللت استهلاكها لأقل كمية ممكنة هيحميك بنسبة كبيرة من الأمراض دي وممكن كمان يشفيك من أمراض معينة زي انسداد الشرايين أو السكر.

الخلاصة أن أكلك مينفعش يكون فيه أكثر من ١٠٪ من مصدر حيواني مهما كان، يعني لو هتاكل ٢٠٠٠ كالوري في اليوم، متعديش أكتر من ٢٠٠ كالوري في يومك كله من مصدر حيواني (٢٠٠ كالوري دي يعني شريحتين جبنة أو ١٠٠ جرام فراخ)، والأفضل طبعاً أنك تبطل خالص و تستبدل كل حاجة في أكلك بمصادر نباتية.

٣- طيب أنا عايز أبدأ، بس محتاج أفهم أكتر و أشوف ناس تشجعني؟

بسيطة، عندك مواقع الدكاترة اللي اتكلمت عنهم فوق عليها معلومات كتير و وصفات أكل و حاجات كتير تساعدك في المشوار ده
خد عندك
http://www.dresselstyn.com/site/
http://nutritionstudies.org
http://deanornish.com
واحد من رواد الحركة دي اسمه Dr. McDougall عامل برنامج متكامل يفهمك كل حاجة و ده اللينك
https://www.drmcdougall.com/health/education/free-mcdougall-program/
عندك كمان المواقع دي مهتمة بالموضوع ده و ممكن تساعدك في الطريق
http://www.forksoverknives.com
http://www.onegreenplanet.org
http://www.mindbodygreen.com/0-952/PlantBased-Diet-for-Beginners-How-to-Get-Started.html

كمان مصطفى حلمي وباسم يوسف عاملين جروب للنظام ده، تقدر تعرف منه كل اللي نفسك فيه عن النظام؛ تأكل ايه وازاي وتجيب أكلك منين، الجروب من هنا: https://www.facebook.com/groups/175153699520925/

٤- طيب لو أنا ما أكلتش حاجات حيوانية، هجيب بروتين منين؟

البروتين موجود برده في النبات، في البقوليات بالأخص، بس بنسب أقل شوية من الأكل الحيواني وغالباّ غير مكتملة>

يعني ايه الكلام ده؟
التشبيه اللي هقوله ده هو أكتر حاجة ممكن تبسط الموضوع و تفهمك فكرة البروتين، مقتبس من كتاب the China Study ل د. كامبل

البروتين هو عبارة عن سلسلة مكونة من وحدات صغيرة اسمها amino acids أو ال AA . ودول في منهم كتير، بس المهم انك تتدخل جسمك 9 amino acids معينين لأن جسمك مستحيل يصنعهم بنفسه، بيسموهم essential amino acids. زي السبحة كده فيها خرز كتير، كل واحدة ليها لون وشكل مختلف، جسمك يقدر يصنعهم كلهم ما عدا ٩ خرزات لازم تاخدهم في أكلك.
البروتين (السبحة) أول ما بيدخل جسمك بيتفكك للوحدات البنائية؛ ال AA وبعدين جسمك يرجع يرصهم تاني بنفس الترتيب اللي المفروض تكون عليه علشان تبني عضلات. فلو البروتين اللي انت بتاخده فيه كميات من ال AA بنسب مشابهة لتركيب العضلة بتاعتك، هيقدر يعيد ترتيبهم بسهولة علشان يكون عضلات.

طيب أيه أقرب بروتين فيه نسب مشابهة من ال AA زي عضلاتي؟

الأجابة هي لحمة أخوك الانسان اللي قاعد جنبك، زي ما بيقولوا كده؛ it is the perfect match. تاني أكتر بروتين فيه نسب مقاربة هو ال whey اللي في اللبن و بعدها اللحوم.

طيب أنا دلوقتي ازاي آخد بروتين متكامل علشان ابني عضلاتي وابعد عن المصادر الحيوانية؟

 ببساطة، نوّع في الأكل. يعني مثلا طبق أرز و بسلة على بعض بيحتوي على نسب مقاربة من ال AA زي اللحوم (بس طبعا بكمية أقل). أمثلة تانية كتير زي: عيش وفول، أرز وفاصوليا بيضاء، رغيف بزبدة فول سوداني، كتير صدقني، المهم تنوع.

٥- طيب هو طالما في أبحاث كده بتثبت خطورة الأكل الحيواني علينا كبشر، ليه الحكومات مش بتنبه الناس وتسيب كل واحد يختار مصيره بمزاجه؟

لعدة أسباب؛ السبب رقم واحد هو ان متوسط عدد السنين علشان نتائج البحث العلمي تبدأ توصل لعامة الشعب هو ١٧ سنة (ده المتوسط الطبيعي لأي بحث)، أحسبها؛ علشان يوصل لمناهج التعليم في كليات الطب، ويبدأوا الدكاترة يغيروا ثوابت كونية الناس اتولدت عليها، الحاجات دي بتاخد وقت، والموضوع ده بالذات هياخد أطول من كده شوية (رغم أن في بوادر حصلت في أكتوبر اللي فات لما منظمة الصحة حذرت من اللحوم المصنعة)
ليه؟ علشان أنت عايش في مجتمع رأسمالي، رأس المال ليه أكبر تأثير على قرارات الحكومة، وأهم من الشعب، بمراحل.

قصدك ايه؟ قصدي يا سيدي أن الكلام ده مش من مصلحة ناس كتير أنه يطلع للشعب، الناس دول هم رؤوس الأموال. عارف أنت الكلام ده لو وصل لكل الناس في كام شركة هتفلس؟ هقولك، أولا صناعة اللحوم وهي صناعة عنيفة جداّ في المجتمع الغربي بالأخص، المنتجات الحيوانية هنا هي أساس الأكل عند كل الناس، وهي أساس كل مطاعم الأكل في الغرب، لو الصناعة دي وقفت، فيه رؤوس أموال كبيرة هتقع وهيقع معاها اقتصاد البلد.

صناعة اللحوم مش حاجة محلية بتجيب لأمريكا فلوس من الداخل بس، لأ، أمريكا من أكبر مصدري اللحوم للخارج ده غير مطاعم ال fast food اللي تبعهم و مكتسحة العالم كله زي ماكدونالدز وكنتاكي وبابا جونز.

شركات الأدوية اللي هتفلس، الشعب الأمريكي في ٢٠١٤ صرف أكتر من ٣٧٤ بيليون دولار على ال prescription drugs (الأدوية اللي بتتصرف بروشته) بس! جزء ضخم جدا جدا جدا من الفلوس دي رايح على أمراض القلب والسرطانات والسكر اللي مفيش بيت أمريكي مفهوش مرض من الثلاثة دول، تخيل لو الأمراض دي قلت جدا؟ أنت بتتكلم في رقم أكبر من ميزانية مصر تقريبا و ممكن الشركات دي تخسر معظمه.

صناعة الجيم و ايهام الناس ان صحتك في عضلاتك، لأنه مستحيل يكبرلك عضلاتك بسرعة من غير مساعدة ال IGF-1 اللي في الألبان و البروتين الحيواني. نفس الحاجة اللي بتجيب سرطانات و سكر بعد كده. أنت متخيل الصناعة دي (صالات الجيم والمدربين الأمريكين) وصناعة المكملات الغذائية بتجيب فلوس قد ايه لأمريكا؟

متفهمنيش غلط، الجيم والتدريب مهمين جدا لصحتك، بس خليه طبيعي، خلي جسمك ياخد وقته في النمو. يا تختار تطلع عضلات حلوة في ٣-٩ شهور وتمشي وراء كلامهم وتعرض نفسك للأصابة بالسكر والسرطان، يا إما تاخدلك ٣-٤ سنين جسمك بيتحسن طبيعي بالاعتماد على النباتات بس، بس من غير مخاطر، الاختيار يرجعلك.

بلاش دي، السياحة العلاجية اللي هتقف، انت عارف في دخل قد ايه بييجي لأمريكا وأوروبا من دول الخليج علشان بييجوا يتعالجوا من أمراضهم هنا؟ بحكم المكان اللي أنا فيه (أكبر مستشفى للسرطانات في أمريكا)، يوميا بشوف عندنا خليجيين وعرب جايين يتعالجوا من السرطانات اللي بتجيلهم.

٦- طيب ربنا خلق الحيوانات ليه طالما مش هاكلها؟

معرفش، وميفرقش معايا، اللي يفرق معايا أن دخول المنتجات دي جسمك بكميات كبيرة هيضرك. ربنا مقالكش لازم تاكل كمية معينة أو ب frequency معين. كمان ربنا خلق حيوانات كتير وانت مبتاكلهاش برده! خلق التمساح والأسد والفيل والزرافة والحمار الوحشي والخرتيت وسيد قشطة والنسناس  حللك أنك تأكل من أي حاجة فيهم لو عايز بس انت مبتاكلش علشان حاسسها قرف! مش معنى أنه سمحلك أنك تأكل حيوانات، أنك لازم تأكل حيوانات!

٧- بس اللبن مفيد علشان الكالسيوم! كده هجيب كالسيوم منين علشان عضمي؟

لأ، الكالسيوم موجود بوفرة في النباتات برده، اللبن ربنا وجده علشان يغذي الطفل لأول فتره في حياته وبس! يعني مفيش أم ينفع ترضع ابنها للابد و برضه مفيش جاموسة أو معزة بتديك لبن للأبد، ده حاجة اتوجدت علشان تسرع نمو الطفل (أو البقرة البيبي) في أول حياته، تديه ال kick start يعني، مش علشان تعيش عليها للأبد.

وبالنسبة لموضوع هشاشة العظام،

فاللبن مثبت أنه بيوفر بيئة حمضية حوالين العضم، وده بيكسر مش بيبني العظم. الدليل؟ أمريكا وهي من أكتر الشعوب استهلاكاّ للألبان وعندهم معدلات هشاشة العظام تتخطى الدول النامية اللي مش بيشربوا لبن! تفتكر ليه؟ بالظبط، عمالين يشربوا في لبن!

(بالاضافة للعوامل التانية اللي بتوفر بيئة حمضية زي القهوة وكل المنتجات الحيوانية، واللي برده الشعب الأمريكي عايش عليهم).

٨- طيب أنا لو مشيت ع النظام ده مش هنزل في كتلتي العضلية؟

اه هتنزل أكيد، بس مين قالك أن الصحة هي عضلات وبس؟
العضلات مهمة طبعا بس مش هي كل حاجة. لو محتاج برده تحافظ على كتلتك العضلية يبقى تكتر من البقوليات في أكلك. أو لو بتاخد مكملات زي ال whey protein powder تقدر تستبدلها ب pea protein powder or brown rice protein powder.. ولو أن دي حاجات د. إيسلستين مش بيشجعها لأنه مقتنع ان نسبة البروتين المفروض تكون ١٠٪ من أكلك ودي النسبة اللي هتاخدها طبيعي من الأكل النباتي من غير ما تقعد تحسب. بس ممكن تكتب على جوجل vegan athletes وهتشوف بنفسك أن في ناس كتير نباتيين وعندهم كتلة عضلية كبيرة عادي، بس طبعا الموضوع أصعب من ان يكون نظام أكلك حيواني. هياخد منك مجهود أكتر.

٩- أمال ليه التوصيات أن يكون ١٥٪ من أكلك بروتين حيواني؟

أولا: التوصيات أن يكون ١٥٪ من أكلك بروتين، مش متحدد أنه يكون حيواني، الفكرة ان الاعلام و ال marketing ربطوا في مخك كلمة بروتين باللحمة، البروتين موجود برده في النباتات.
ثانيا: هو مين بيحط التوصيات؟ ال USDA/ United States Department of Agriculture ؛ دول هم المسئولين عن التوصيات الغذائية، وزي ما قلتلك فوق، مش من مصلحتهم أنك تعرف الكلام ده. ليه؟ لأن في رؤوس أموال متحكمة في قراراتهم، ولو اتفرجت على الفيلم الوثائقي اللي أنا حاطت ليه لينك فوق (forks over knives) هتلاقي أن اللجنة المخصصة لعمل التوصيات الغذائية اترفع عليهم قضية بالفعل لصلتهم بشركات غذائية ضخمة والدكاترة كسبوا القضية ضد ال USDA. يعني توصياتهم ملعوب فيها.

وكمان لو تأخد بالك هم بيوهموك دايما أن البروتين الحيواني هو اللحوم، وده غلط؛ البروتين الحيواني هو اللحوم والجبن والبيض والألبان. لأنك لما بتفتكر أن البروتين الحيواني هو اللحوم بس، بينتهي بيك الحال انك بتاكل حوالي ٤٠٪ من أكلك بروتين حيواني (الألبان والجبن والبيض وساعات كمان الأسماك اللي محدش بيحسبهم)..

وتاني بنأكد أن اللي الأبحاث أكدته هو أن زيادة دخول منتجات حيوانية (أكتر من ١٠٪ من إجمالي أكلك) جوه جسمك مربوطة بالأمراض دي كلها، والأفضل أنك تمنعها تماماّ لأن برده الأبحاث أثبتت أن اللي مش بيدخلوا المنتجات الحيوانية جسمهم وبيعتمدوا على مصادر نباتية فقط كان متوسط أعمارهم بيوصل ل ٨٠-٩٠ سنة و كانوا بيموتوا بصحة جيدة؛ من غير أمراض قلب أو سرطانات.

١٠- قالولي في الجيم متخافش من الكوليستيرول اللي في البيض واللحوم لأن جسمك محتاجهم علشان يصنع ال sex hormones والتيستوستيرون (هرمون الذكورة)؟

أنت فعلا محتاج كوليستيرول علشان تصنع التيستوستيرون وهرمونات تانية كتير كمان، بس الكوليستيرول ده حاجة الخلايا في جسمك بتصنعها و مش محتاج تاخدها في أكلك، أي كوليستيرول بتاخده من برة بيترسب في شرايينك وبيبدأ يقفلها. عارف أنت لما بيحصلك كده و بتروح للدكتور بيعملك ايه؟ بيبديك دواء من عائلة ال statins (هتلاقي المادة الفعالة أخرها مقطع statin زي atorvastatin مثلا المشهور بالاسم التجاري Lipitor أو Rosuvastatin المشهور بالاسم التجاري Crestor و اللي هو تاني أكتر دواء بيتصرف في أمريكا، متربع ع العرش يعني) عارف الدواء ده بيعمل ايه؟ بيوقف تصنيع الكوليستيرول "الطبيعي" جوه الخلايا بتاعت جسمك علشان توصل في الاخر لنسبة إجمالية مقبولة. طيب ليه تاخد دواء علشان يقلل الكوليستيرول! أنت ببساطة لو قفت المنتجات الحيوانية مش هتحتاج أي دواء و جسمك هيصنع كوليستيرول طبيعي على قد احتياجه!

١١- طيب مش ممكن ييجيلي نقص فيتامينات أو حديد؟

لأ، الفيتامين الوحيد اللي ناقص في النباتات هو B12 وهتضطر تاخده أقراص من بره، كل حاجة تانية موجودة بس اهتم انك تنوع جامد وتأكل خضار كتير أوي (على قد ما تقدر) وفاكهة. في المقابل المصادر الحيوانية مفهاش غير الـB12 وكام حاجة تانية قليلة، و ناقصين في معظم الفيتامينات و المعادن.