اسمع كلام مجرّب .. بعد سنة من الإلتزام

بقلم: محمد الشنراوي

بداية لازم أؤكد علي إني بتكلم من تجربة شخصية بحتة مقترنة بقراءات عن النظام الغذائي ده وليست عن دراسة أو تخصص في المجال الغذائي .. وده عشان أحفزك إنك تعمل مجهودك الشخصي بالبحث والقراءة أكتر من المتخصصين..

أولا إيه Whole-Food, Plant-Based Diet

ببساطة هو نظام غذائي يعتمد بشكل عام على أكل الحبوب الكاملة والخضروات والفواكه للحصول علي الطاقة والحفاظ علي الصحة العامة.. وفي نفس الوقت تنحية اللحوم بمشتقاتها, والزيوت بأنواعها, والألبان ومنتجاتها, وأي طعام مصنع بما فيها العصائر المعلبة واي خضروات معلبة أو مجمدة, وكذلك المخبوزات من الدقيق الأبيض وما شابه .

يبقي حط التعريف ده عندك وحاول تطبقه كقاعده وامشي عليها ..
السؤال اللي جاي مهم جداًً..

طيب يعني خلاص انتهى زمن الأكل الجميل ؟!!

أنا برد من تجربتي الخاصة, فا إذا عجبك كلامي أهلا بيك.. واذا حسيت إنك مش مقتنع طبعا لك كل إحترام.

مقدمة لابد منها

لازم نعترف إننا كمصريين وعرب عامةً بناكل إحنا وأبائنا وأجدادنا بشكل غير صحي .. وكلنا نشأنا وترعرعنا على صينية البطاطس باللحمة.. أو الفراخ والكوارع .. والمحاشي والفتة اللي باللحمة الضاني .. والحلو بتاعنا بسبوسة وكنافة وكيك ووووو 😹😹 والقايمه مابتخلصش ..

يعني الموضوع بقى في دمنا.. في جيناتنا يا جماعة.. وعشان خاطر ربنا بلاش نجلد ذاتنا..
إذا بطلت تاكل لحمة وفراخ بس لسه بتحط ملح عادي ع الأكل.. ولا معلقة سكر على الشاي بعد ماكنت بتحط أربعة.. أو ضعفت وانت مع صحابك وضربت ساندوتش كفتة عشان الريحة كانت تجنن .. بس صحيت الصبح وكلت شوفان بالموز, أو شربت سموثي معمول ف البيت فريش من غير سكر.

لأ ياجماعة بالراحة على نفسكم شوية.. واذا فعلا بدأت تعمل الدايت ده توقع إنك حتضعف كتيير وحتبوظ الدايت كذا مرة.. بس المهم تبقي  كده 😹💪 وتعرف إنك إنسان مش آلة.. وعايش في مجتمع كامل ماشي غلط.. من أول المكرونة البشاميل اللي ماما عملتها النهاردة وأنا كنت ف الشغل لحد بليل فاتعشيت بيها الساعة عشرة وحبست بكانز فيروز عشان الحموضة.. لحد عربية الكبدة والسجق اللي علي أول الشارع وريحتها بتقتحم عليك دنيتك.. كإن الراجل ده فاتح مخصوص عشان يعذبك انت مش عشان يسترزق 😂.

يبقي إعرف إنك حتضعف وتغلط .. بس أهم حاجة كمّل وغيّر بالتدريج .. لحد ماتوصل إنك مابتضعفش قدام اللحمة والفراخ والمقالي..  بل بالعكس بتجيلك قرفة لما بتشم ريحتها.. وبعد ما أهلك وصحابك كانوا بيتريقوا علي أكلك حتبصلهم ويصعبوا عليك لأنك بعد فترة حتحس بالتغيير بتاعك بيجي من جواك من خلال طاقتك الإيجابية اللي بتتولد لما جسمك يطرد السموم والدهون اللي تراكمت علي مدى عمرك كله .. وثقتك بنفسك اللي بتزيد كل يوم لما وزنك يوصل لنفس وزنك وانت عندك ١٦سنة وماكنتش تحلم بكده في عمرك .. وتقدر تجري وتطلع السلالم ومتنهجش بعد ماكنت بتتعب لما توطي تربط الجزمة، ولما صحابك يشوفوك ويقولولك ماشاء الله وشك منور النهاردة عشان بشرتك أصبحت نضيفة من السموم والحبوب والهالات السودة إختفت ..

كلمني أكتر عن التغييرات الملحوظة بعد اتباع النظام

لو سألتني عن التغيير الملحوظ .. فطبعا أول شئ حتلمسه هو:

• مستوى الطاقة اللي بيزيد بداية بعدم الشعور بالوخم بعد كل أكلة والحاجه للنوم أو الكسل.. ثم الراحة فمعدتك وعدم الحاجة للأدوية المساعدة على الهضم.. وكمان استقرار الحركة المعوية..
• بعد فترة حتبتدي تلاحظ نزول في الوزن .. وده حينعكس على حالتك النفسية طبعا وثقتك بنفسك ..
• كمان بشرتك حتصفى وتلاقي اللي حواليك يلاحظوا ده ويقولولك ماشاء الله عليك وشك منور النهاردة ..
• بالنسبه ليا أنا شخصيا فأنا بشعر بعد سنة كاملة من الإلتزام بالنظام ده إن صحتي أحسن مما كنت وانا ف العشرين (أنا عندي ٤٤ سنة دلوقتي).
• قدرت أبطل تدخين بسهولة جدا وده عشان جسمي أصبح خالي من السموم.. فبالتالي بقى يرفض أي شئ ضار يدخل له بشكل اتوماتيكي
•  كمان كنت بتعالج من كوليسترول عالي كان واخدني في سكة جلطة.. ودلوقتي أنا بجري لمدة ساعتين في اليوم ومعنديش مشكله خالص مع الكوليسترول
• أنا نزلت حوالي ٣٧ كيلو في سنة ومحتاج كمان ١٢ كيلو عشان أوصل للوزن اللي فبالي.

بالنسبة للملح, في رأيي أن مش مشكلة قوي إنك تقلل الملح في البداية لحد ما الموضوع تظهر نتايجه وتتشجع

بالنسبه للسمك, أنا بأكل سمك وسي فود مرة في الأسبوع..  لكن حاليا بعمله في الفرن مع كل الخضروات اللي في بالك وبدون أي زيت طبعا.. وبتلفه في فويل نص الوقت وبعدين بتفتح الفويل وتخليه يحمر..

أهم شئ إنك توقف أكل لحوم أو فراخ أو أي شئ مصنع: برجر, هوت دوج, لانشون.. وكمان الجبن والألبان.. وأخيرا الحلويات بانواعها .. وطبعا الصودا .. وتستبدلي كل ده بخضار وفاكهة طازة ونية ومش مطبوخة على قد ماتقدر, خس خيار جزر إلى آخره.

في النهاية

أنصحك بالرفق بنفسك في أول المشوار.. يعني غير نظام أكلك واحدة واحدة.. كل أسبوع غير شئ سواء بالإضافة أو الحذف.. وأدي لنفسك وقت تشوف النتيجة.. وبعدين كمل وخش على اللي بعده

لازم تبدأ تمشي كتيير إذا حبيت تنزّل وزنك.. الأكل لوحده أو الرياضة لوحدها مش كفاية .. لازم الاتنين مع بعض. 

المشوار طويل كمل و متحبطتش لو مره ضعفت .. ولما تقرر أنك تاكل بإختيارك مش علشان ضعفت إعرف إنك وصلت.

أتمنى الصحة والسعادة للناس كلها😇