كباب العدس التركي

وصفة: أسامة خليل

المقادير كالتالي :
فصين توم,كوباية عدس أحمر, نص كوباية برغل, بصلة, نص حزمة بقدونس,معلقة صغيرة كمون, معلقة صغيرة بابريكا, نص معلقة صغيرة نعناع ناشف, معلقة صغيرة صلصة طماطم, معلقة صغيرة معجون الفلفل الرومي(فلفل رومي احمر نشويه و يفضل على شعلة البوتاجاز و نضربه في الخلاط) , عصير لمونة (اللمون المصري اللي بره عندهم اللمون كبير هناخد نصها بس), نص معلقة صغيرة شطة مطحونة.

طريقتها كالتالي :
1.هنجيب مية و نسوي العدس و نسيبه يستوي لغاية ما يتهري, لما نكشف الحلة هنلاقي فيها لسه مية مقدارة نص عقلة الصباع, لو العدس شرب المية كلها هنغلي مية و و نزودها , بعدين نحط البرغل و نسيبه 5 دقايق هيستوي لوحده, ونسيبهم شوية على جنب.
2.هنفرم البصل و التوم و نشوح البصل بالمية او بشوربة الخضار زي ما احنا متعودين , البصل الاول لغاية ما يدبل و بعدين التوم لغاية ما تطلع ريحته , التوم ما يتشوحش كتير لانه بيتحرق و بيبقى طعمه مر, و نخلطهم بمعجون الفلفل الرومي الاحمر و الصلصة و نحط معاهم معلقة الكمون و البابريكا و الفلفل الاسود و الشطة و النعناع.
3. هنقطع نص حزمة البقدونس (الورق بس)و الاتراك بيزودوا معاها حوالي 5 حبات بصل اخضر بس محبتش اعمل كده, و نزودها لكل اللي فات و نخلطهم كويس اوي.
4.هنصبع الكفتة بتاعتنا, و نحطها على صينية مفروشة بورق زبدة, و ندخلها على الشواية من 5-10 دقايق بس مش اكترو نقلبها على الوش التاني برضه نفس المدة.
5.الخطوة دي اختيارية و مبيعملوهاش الاتراك بس انا عملتها, جبت حتة زبدة-ايام ما كنت بستعملها- و ولعت فحمة و خليتها تجمر و حطيت عليها الزبدة و حطيتها في الصينية و غطيتها علشان تاخد نكهة الشوا.
ممكن تعمل سندوتشات مع طحينة., ممكن زي كفتة داود باشا مع صوص الطماطمو ممكن لوحدها مع بطاطس في الفرن.