امنع تصلب الشرايين (2)

بقلم: أحمد طارق العادل

س: هل أنا ممكن أكل بروتين وجسمى ما يستفدش منه؟

ممكن.. مثلاً الكولاجين هو تلت البروتين اللى الجسم مبنى منه.. بيسموه الأسمنت لأنه فى كل حتة.. الجلد.. المفاصل.. الغضاريف.. العضلات.. م بين الخلايا..الجروح..القرنية.. العظم.. وطبعاً القلب والشرايين
الكولاجين عشان الجسم يصنّعه لازم فيتامين سى فى المعادلة.. لو مفيش فيتامين سى يبقى مفيش كولاجين.. .. مفيش أسمنت.. فالدم بيطلع من الشرايين.. الجروح بتفتح ومش بتقفل.. اللثة بتزنف والأسنان بتقع.. المناعة بتضعف.. الجسم بينهار فى خلال شهر ل 6 شهور وبيموت.. المرض المُرعب ده اسمه الاسقربوط scurvy..مات بسببه ناس كتير.. وكان مشهور عند الناس زمان زى م احنا دلوقتى مشهور عندنا السرطان وتصلب الشرايين.. الاسقربوط بيحصل لو الأكل م فيهوش فيتامين سى.. حتى ولو نباتى100%
...

س: احنا أجسامنا محتاجة اد ايه فيتامين سى؟

هى دى مشكلة فيتامين سى.. الاسقربوط هو الحالة النهائية اللى الجسم بينهار فيها.. وتقدر تمنعها بنسبة قليلة جداً من فيتامين سى.. يعني من10ل90ملليجرام كفاية يمنعوا الاسقربوط.. مش معنى إن الجسم مانهارش إنه مش محتاج فيتامين سى أكتر.. لأ ده هو كده واخد 4% بس من احتياجه وبيعافر عشان يشتغل.. الحقيقة هى إن الجسم محتاج أكتر من 1000 ملليجرام فيتامين سى يومياً (المتوسط 2300) عشان يشتغل بكامل كفائته 100% ..وهى دى الصحة المثالية.
لما تقرأ إن الفاكهة دى فيها فيتامين سى 50% أو 380% هو يقصد من ال90 ملليجرام عشان تمنع الاسقربوط .. مش من ال2300 ملليجرام عشان تمنع تصلب الشرايين!
تصلب الشرايين بيحصل لو الأكل قليّل فى فيتامين سى.. حتى ولو نباتى100%
...

س: ايه اللى بيحصل لو أديت الجسم يومياً 90 ملليجرام بدل 2300 ملليجرام؟

الجسم بيعافر.. بيشتغل ب 4% من كفائته بدل 100%.. ولأن حفظ الدم جوا الشرايين ده أولوية فالجسم بيرمى دهون و(لايبو- بروتين) فى الشرايين عشان الدم م يطلعش منها.. عشان يحميك..العملية دى اسمها تصلب الشرايين.. لو كملت لفترة طويلة(40 سنة مثلاً) تدخلنا فى أمراض القلب والجلطة فى المخ لا قدّر الله.. أمراض مش بتتعالج.. لكن تصلب الشرايين سهل تمنعه.
...

س: ليه التدخين ومرض السكر والدرن بيجيبوا تصلب شرايين أسرع؟

لأن فيتامين سى له وظيفة تانية فى الجسم.. هو مضاد للأكسدة .. التدخين ومرض السكر وأمراض تانية بيستهلكوه كمضاد للأكسدة.. فبيتبقى منه كمية أقل لتصنيع الكولاجين.. فالجسم بيرمى دهون و(لايبو- بروتين) فى الشرايين عشان الدم م يطلعش منها.. عشان يحميك.. العملية دى لو طولت تدخلنا فى تصلب الشرايين.. وهكذا.
مثلاً شرب سيجارة واحدة بيستهلك25 ملليجرام فيتامين سى من مخزون الجسم..كيلو البرتقان فيه 532 ملليجرام فيتامين سى.. يعنى احنا محتاجين حوالى كيلو برتقان عشان نعادل تأثير20 سيجارة.. الأرقام طبعاً بتختلف من دراسة لدراسة.. الحسبة مش بالدقة دى.. بس هى بتديك فكرة عن حجم المشكلة.
راى 2010 عمل تجربة.. شرب الفئران سجاير جالهم تصلب شرايين.. شرب الفئران سجاير واداهم فيتامين سى مجالهمش!
مرض السكر مضاعفاته بتحصل بنفس الطريقة..استهلاك فيتامين سى.. يعنى تقريباً نفس المشكلة.. (برايس 1996،2001)
وبالتالى.. لو احنا عندنا سكر أو بنشرب سجاير.. هنكون محتاجين فيتامين سى أكتر عشان نمنع تصلب الشرايين.
...

س: يعنى ايه أصلاً كلمة فيتامين؟

فيتامين يعنى:
1 مادة الجسم مش بيصنعها لكن محتاجها
2 وموجودة بنسبة قليّلة فى الأكل.. تكفى لمنع مرض مُعيّن.
فيتامين سى مشكلته أن احنا فاكرينه فيتامين(يعنى الجسم محتاجه بنسبة قليلة) وهومش فيتامين(يعنى الجسم محتاجه بنسبة كبيرة) للأسباب دى
1 أغلب الحيوانات بتصنعه فى جسمها من الجلوكوز(أبسط سكر)
2 وبتصنعه بنسبة كبيرة جداً من2000 ل20,000 ملليجرام كل يوم(لو وزنها زى الإنسان 70 كيلو).. ولو هى تحت أىstress بتزود التصنيع ل 10 أضعاف.
3 لو هو موجود بنسبة قليلة فى الأكل 90 ملليجرام.. بيمنع الاسقربوط(الانهيار) اه..لكن بيحصل تصلب شرايين!
4 وهو موجود فى الأكل الطبيعى بالنسبة الكبيرة اللى احنا محتاجينها.. المتوسط له فى 110 نبات بيتاكلوا بدون طبخ 2300 ملليجرام.. يعنى تقدر تدخل جسمك من 1000 ل 16,500 ملليجرام طبيعى من الأكل كل يوم!
فيتامين سى كميته بتقل لما الخضار والفاكهة يعدوا شوية.. بتقل مع الحرارة والطبيخ والأكل المتصنع
5 الغوريلا من أقرب الحيوانات لينا تشريحياً.. وزنها ضعف الإنسان وجسمها مش بيصنعه زينا.. وبيدخلها من أكلها الطبيعى ورق أخضر4500 ملليجرام يومياً!
6 يعنى الرقم الأقرب للصحة المثالية 2300 ملليجرام
...

س: هل فيه حد دارس مؤيد لأن أجسامنا محتاجه 1000 ملليجرام أو أكتر يومياً؟

اه.. علماء ودكاترة كتير.. أشهرهم
ألبرت جيورجى(نوبل فى الطب1937 لأنه مكتشف فيتامين سى)
لينوس بولينج(جايزتين نوبل1954،1962) أثبت سنة 1970 إن المتوسط الطبيعى لفيتامين سى فى 110 نبات 2300 ملليجرام.. وأثبت سنة 1990 إن نقص فيتامين سى لوحده بيعمل تصلب شرايين.
روجر ويليامز(هو اللى سمى الفوليك أسيد- فيتامينB9 باسمه، ومكتشف فيتامينB5)
يعنى بإختصار
الجسم اللى مثبته زى الأسمنت بروتين اسمه كولاجين.. الكولاجين عشان يتصنع لازم فيتامين سى.. فيتامين سى موجود فى الفاكهة والخضار(من غير طبخ).. فلو بتاكل يومياَ من 5 ل10 ثمرات فاكهة وخضار متوزعين ع مدار اليوم.. ومنقي حاجات غنية بالفيتامين زى الجوافة والفلفل الأصفر والبقدونس والفلفل الأحمر والأخضر.. سهل تاخد كمية كبيرة من الفيتامين طبيعى.
اليوم اللى كل الناس هتدخل جسمها 1000 ملليجرام أو أكتر يومياً- وده سهل أوى- تصلب الشرايين إن شاء الله هيختفى.

البوست ده فيه شرح مشكلة تصلب الشرايين وازاى نقدر نمنعه للى عايز يعرف أكتر..

المصادر